|
|
|
|
|
|
|
|
|
Stqarrijiet Stampa
|
Iktar Fondi mill-EU għall-Kunsill Lokali tal-Għarb
|
|
|
It-Tieni Fażi tal-proġett f’Wied il-Mielaħ fil-Għarb – Lejn Turiżmu Ekoloġikament u Kulturalment Sostenibbli
Wara li l-Kunsill Lokali Għarb wettaq b’suċċess l-ewwel fażi ta’ proġett ambjentali f’Wied il-Mielaħ, grazzi għall-għajnuna ta’ Fondi Strutturali għal Malta 2004 – 2006, l-istess Kunsill qed jerġa jingħata għajnuna biex jgħaddi għat-tieni fażi ta’ dan il-proġett ambizzjuz li daħal għalih. Din id-darba qed tingħata għajnuna ta’€569715 taħt il-Fond ta’ Koeżjoni 2007 – 2013.
Fl-ewwel fażi tal-proġett il-Kunsill seta’ jwettaq xogħol ta’ konservazzjoni u protezzjoni ta’ Wied il-Mielaħ - xogħolijiet relatati mal-kostruzzjoni u rranġar ta’ parti mill-ħitan tas-sejjieħ li l-iktar li kienu fi stat ħażin, kif ukoll parti mit-tindif tal-Wied. Permezz tax-xogħolijiet li ser iwettaq issa, il-Kunsill ser jibdel l-inħawi ta’ Wied il-Mielaħ u ‘l madwar fi proġett ta’ mixjiet fil-kampanja biex itejjeb il-prodott turistiku f’Għawdex.
Ix-xogħolijiet li huma ppjanati li jitwettqu u li huma maħsuba li jieħdu madwar 18-il xahar ser jinkludu fost l-oħrajn:
• Jingħata wiċċ ġdid lit-triq u jinbena ċint matul it-triq kollha.
• Titjieb l-aċċessibilita’ permezz tal-bini ta’ pontijiet.
• Isir tindif tal-Wied u bini ta’ ħitan tas-sejjieħ kif ukoll bini ta’ lqugħ ta’ l-ilma
• Jitħawlu siġar kif ukoll installazzjoni ta’ għamara rustika.
• Jitranġa t-taraġ li jinżel għall-baħar.
• Jitpoġġew cameras li jaħdmu permezz ta’ enerġija solari
• Jitwaħħlu tabelli indikattivi.
• Jiġi ppubblikat materjal informattiv bi brochures u ktejjeb dwar l-inħawi ta’ Wied il-Mielah u postijiet oħra ta’ interess fl-Għarb biex jintużaw bħala għajnuna għat –turisit li jinżlu fl-inħawi ta’ Wied il-Mielaħ
• Titjib tal-Website dwar il-proġett
• Installjazzjoni ta’ materjal awdjoviżiv kif ukoll installazzjoni ta’ tromba biex tgħin ukoll lit-turist li jżur il-post igawdi aħjar l-inħawi naturali
Permezz ta’ dan il-Proġett il-Kunsill ser ikun qed jippromwovi l-prodott turistiku ta’ Għawdex b’mod partikolari tar-raħal tal-Għarb. L-iskop aħħari tiegħu huwa li joffri prodott turistiku rinnovat lill-viżitatur barrani u lokali li jżur lil Għawdex speċifikament għall-mixjiet fil-kampanja. Dan ser jagħmel lir-raħal tal-Għarb iktar kompetittiv f’dak li huwa destinazjoni turistika rurali. B’dan il-mod il-Kunsill qed ukoll ikun pijunier f’dan il-qasam anke fil-viżjoni tal-Gvern li jagħmel minn Għawdex Gżira Ekoloġika.
Il-Kunsill jemmen ferm fil-potenzjal ta’ din il-ġawhra unika ta’ dan il-Wied b’mod partikolari għat-tieqa ffurmata b’mod naturali fil-blat u l-baħar ta’ l-inħawi li huwa imfittex kemm għas-sajd u kemm għandu potenzjal kbir biex ikun sit ieħor għall-bugħaddasa.
Il-mira tal-Kunsill mhix biss li l-inħawi ta’ Wied il-Mielaħ jitgawdew mit-turisti imma ukoll li dan il-post jitgawda iktar mill-Għawdxin u mir-residenti tal-Għarb għax ser ikun qed joffri post ideali ta’ mistrieħ għal kulħadd u partikularment għall-familji.
Bħalissa diġa tlestiet parti kbira mit-tindif li hemm ippjanat u nbnew diversi partijiet ta’ ħitan tas-sejjiegħ li kienu fi stat ħażin. Ix-xogħol għadu għaddej u l-Kunsill qed ilesti l-aħħar pakkett ta’ tenders fuq l-istallazzjoni tal-makkinarju. |
|
|
|
|
Mur Lura Fuq
|
|
